Forsíða

Starfsemi

Auglýsing

Sarpur

Auglýsing
Auglýsing
Um Snartarstaði
Þriðjudagur, 07. september 2021 00:00

Byggðasafn Norður-Þingeyinga er til húsa að Snartarstöðum sem eru í um 1 km fjarlægð frá Kópaskeri.

Safnið var opnað árið 1991 í gömlu skólahúsi og eru þar rúmlega 2000 munir til sýnis. Undirbúningur safnsins hófst þó mun fyrr, eða upp úr 1950, þegar fólk sá fram á að glatast mundu ýmsir munir frá hinu gamla bændasamfélagi sem var að líða undir lok. Þeir hlutir sem áður fyrr voru lífsnauðsynlegir voru þarna smátt og smátt að hverfa úr notkun og því var byrjað að safna þeim saman. Árið 1959 fór Ragnar Ásgeirsson, þáverandi ráðunautur Búnaðarfélags Íslendinga, á hvern einasta bæ í Norður-Þingeyjarsýslu til þess að safna saman munum en fékk misjafnar undirtektir, þar sem margir sáu ekki tilganginn í að varðveita þessa muni sem í þeirra augum voru hversdagslegir og ómerkilegir. Lengi vel voru munirnir sem söfnuðust geymdir í geymslum víða um sýsluna en eignuðust loks framtíðarheimili þegar búið var að innrétta gamla skólahúsið sem safn.

Sýningin á Snartarstöðum einkennist af tvennu. Annars vegar er það mikið úrval af hannyrðum af ýmsum toga, svo sem útsaumur, vefnaður, prjónles, þjóðbúningar og margt fleira handunnið. Flestar hannyrðirnar voru unnar af konum af svæðinu. Hins vegar einkennist safnið af bókasafni hjónanna í Leirhöfn, Helga Kristjánssyni og Andreu Jónsdóttur. Árið 1952 gáfu þau sýslunni 9000 binda bókasafn sitt sem Helgi hafði sjálfur innbundið að stórum hluta. Hægt er að skoða bókasafnið og fræðast um Leirhafnarhjónin. Helga var margt til lista lagt og stóð m.a. fyrir stórmerkilegri húfugerð sem einnig er hægt að fræðast um á safninu.

Auk hannyrðanna og bókanna eru margir skemmtilegir munir til sýnis. Þarna eru hefðbundnar menningarminjar á borð við byssur, járnsmíði, trésmíði og ýmsa heimilismuni en einnig má sjá merkilega brunadælu, heimagerð leikföng og skemmtilega smámuni sem tilvalið er að gleyma sér við að skoða.

Safnið að Snartarstöðum er rekið af Menningarmiðstöð Þingeyinga og er opið fyrir gesti yfir sumartímann.

 
 
Auglýsing
Auglýsing
Auglýsing
Auglýsing